Uko hapa: NyumbaniInfos2020 09 25Article 510334

General News of Friday, 25 September 2020

Chanzo: HabariLeo

Miradi yote mikubwa ipo ndani ya bajeti - Hazina

Miradi yote mikubwa ipo ndani ya bajeti - Hazina

WIZARA ya Fedha na Mipango imesema miradi yote mikubwa ya kimkakati, inayotekelezwa nchini imeshapangwa ndani ya bajeti za kisekta za wizara husika, ambazo hupitishwa na Bunge kila mwaka.

Hayo yameelezwa na Katibu Mkuu wa Wizara ya Fedha na Mipango, Doto James wakati wa ufunguzi wa Kongamano la Wanamipango nchini kwa Mwaka 2020 linalofanyika jijini Dodoma.

James alitoa ufafanuzi huo baada ya kusambaa kwa taarifa za upotoshaji, zinazotolewa na baadhi ya wanasiasa kuwa serikali inakurupuka kuibua miradi ambayo haijulikani na haijapangiwa fedha za kuitekeleza.

“Miradi inatekelezwa kwa mujibu wa bajeti inayopitishwa na Bunge ambayo inairuhusu serikali kukopa ndani na nje ya nchi, kukusanya kodi na kupokea misaada ili itekeleze bajeti yake,” alieleza Katibu Mkuu wa Hazina.

Alisema baada ya bajeti kupitishwa kinachofuata ni utekelezaji wa bajeti, ambapo serikali hutumia fedha za makusanyo ya mapato, mikopo na misaada kwa mujibu wa sheria kwa kuwa serikali haipokei fedha holela.

Katibu Mkuu alisema Sheria ya Mikopo, Dhamana na Misaada inampa Waziri wa Fedha wajibu kutafuta fedha za utekelezaji wa bajeti iliyoridhiwa na Bunge.

Kwa upande wa utekelezaji wa mipango ya miradi, alisema kumekuwa na changamoto ya upatikanaji na utunzaji wa taarifa za miradi ambazo huwezesha maandalizi ya mipango na kufanya tathmini ya utekelezaji, jambo lililosababisha serikali kupitia Wizara ya Fedha na Mipango kutengeneza Mfumo wa Kitaifa wa Kusimamia Miradi ya Maendeleo ili kutatua changomoto hiyo.

“Mfumo huo utakuwa na sehemu zote za mzunguko wa mradi yaani kuanzia uibuaji, ugharamiaji, utekelezaji, ufuatiliaji na tathmini, utoaji taarifa na ufungaji wa mradi baada ya utekelezaji kukamilika,” alieleza James.

Aliwaagiza wanamipango wote nchini kuongeza ubunifu katika kupanga mipango mbali mbali ya nchi ili kuiwezesha nchi kufikia malengo kwa wakati.

Alisema kutokana na hadhi ambayo Tanzania imefikia ya kuwa na uchumi wa kati, inabidi wanamipango wabadili namna ya kupanga na kutekeleza mipango ya nchi na kuwakumbusha kuwa suala sio kupanga tu, bali ni kupanga mipango inayotekelezeka na kuhakikisha inatekelezwa ipasavyo ili kupata matokeo yaliyokusudiwa.

Naye Kamishna wa Mipango ya Kitaifa katika Wizara ya Fedha na Mipango, Dk Nicolaus Shombe alisema dhima ya kongamano hilo ni Mipango ya Kujenga Uchumi Shindani Unaoongozwa na Mauzo Nje inayotokana na Mpango wa Tatu wa Taifa wa Miaka Mitano unaotarajiwa kuanza mwaka 2021/22.

Washiriki wa kongamano hilo wameahidi kushiriki kikamilifu kutoa maoni na ushauri, utakaosaidia serikali kuja na Mpango wa Tatu wa Taifa wa Miaka Mitano na Mpango wa Maendeleo wa Taifa wa Mwaka 2021/22.

Join our Newsletter