Uko hapa: NyumbaniBiashara2021 11 17Article 572008

Habari za Biashara of Wednesday, 17 November 2021

Chanzo: Habarileo

Serikali, WB kuendelea kusaidia kaya maskini

Serikali, WB kuendelea kusaidia kaya maskini Serikali, WB kuendelea kusaidia kaya maskini

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mohamed Mchengerwa ameiomba Benki ya Dunia kuendeleza ushirikiano uliopo wa kuzisaidia kaya maskini kupitia Mfuko wa Maendeleo ya Jamii (TASAF) kwasababu umetoa matokeo chanya kwa kuboresha maisha ya kaya maskini nchini.

Mchengerwa ametoa ombi hilo wakati wa ziara ya kikazi ya ujumbe wa Benki ya Dunia uliolenga kukagua utekelezaji wa miradi ya TASAF katika Mtaa wa Nzasa A, Halmashauri ya Manispaa ya Temeke jijini Dar es Salaam.

Mchengerwa amesema lazima Serikali ikiri kuwa TASAF haijasaidia tu kuinua uchumi wa mwananchi mmoja mmoja bali imesaidia kusogeza karibu huduma za kijamii kwa kujenga madaraja, shule na zahanati, hii yote ni kutaka Watanzania waondokane na umaskini unaosababishwa na maadui watatu ambao ni umaskini, ujinga na maradhi.

Mchengerwa amesema, dhamira ya Serikali ya Awamu ya Sita inayoongozwa na Rais Samia Suluhu Hassan kama ilivyokuwa kwa Serikali ya Awamu zilizopita ni kuumaliza umaskini kwa Watanzania na ndio maana imejipanga kuhakikisha watoto wanaotokana na kaya maskini ambao wamefaulu kujiunga na elimu ya juu wanapatiwa mikopo kwa asilimia mia moja ili elimu watakayoipata iwasaidie kupambana na umaskini.

Mchengerwa amesema Serikali itaendelea kushirikiana na Benki ya Dunia katika kupambana na umaskini na kuongeza kuwa TASAF itabakia kuwa ndio nyenzo mojawapo ya kuziinua kaya maskini nchini.

“Tutaendelea kushirikiana katika kuboresha maisha ya Watanzania kupitia utekelezaji wa Mpango wa Kuzinusuru Kaya Maskini nchini ili kuondoa kaya maskini,” Mchengerwa amesisitiza.

Kwa upande wake Mkurugenzi Mtendaji wa Sera za Maendeleo na Ubia wa Benki ya Dunia, Prof. Mari Pangestu amesema ameona jinsi TASAF ilivyoboresha maisha ya Watanzania wengi wanaotokana na kaya maskini na kuongeza kuwa, ni dhahiri TASAF imepunguza kiwango cha umaskini nchini.

“Nikiwaangalia ninawaona mkiwa na afya njema, na ni matumaini yangu kuwa mtaendelea kujali afya zenu ili muweze kujishughulisha na shughuli mbalimbali za maendeleo,” Prof. Pangestu ameongeza.

Prof. Pangestu amemhakikishia Mchengerwa kuwa, Benki ya Dunia itaendeleza ushirikiano na Tanzania katika kupambana na umaskini kupitia Utekelezaji wa Mpango wa Kuzinusuru Kaya Maskini nchini unaoratibiwa Mfuko wa Maendeleo ya Jamii (TASAF).