Uko hapa: NyumbaniUkurasaMaoniArticles2021 08 19Article 552463

Maoni of Thursday, 19 August 2021

Columnist: kiswahili.tuko.co.ke

Chanjo ya COVID-19 Tanzania: Mwelekeo mzuri, bado safari ni ndefu

Chanjo ya COVID-19 Tanzania: Mwelekeo mzuri, bado safari ni ndefu Chanjo ya COVID-19 Tanzania: Mwelekeo mzuri, bado safari ni ndefu

Wizara ya afya ya Tanzania ilitoa takwimu za idadi ya watu waliopatiwa chanjo ya COVID-19Waliopata chanjo nchini humo imefikia laki 2.07 Hii ikiwa ni moja ya hatua za kupambana na janga la virusi vya CoronaChanjo ya COVID-19 ilianza kutolewa nchini Tanzania baada ya Rais Samia Suluhu kuzindua kazi ya utoaji wa chanjo, na yeye mwenyewe alipewa chanjo hiyo mbele ya vyombo vya habari.

Ikilinganishwa na idadi ya watanzania ambayo inakadiriwa kukaribia milioni 60, idadi ya watu laki 2.07 ni ndogo sana, na inaleta wasiwasi kama kazi ya utoaji chanjo inaweza kuwa na mafanikio yanayotarajiwa kwenye kuondoa janga nchini Tanzania.

Lakini pia ikilinganishwa na muda mfupi wa tangu utoaji chanjo uanze hadi sasa, na hasa ikizingatiwa upinzani mkali na upotoshaji kuhusu chanjo unaotoka kwa watu wenye ushawishi mkubwa katika jamii ya Tanzania, tunaweza kusema idadi ya watu zaidi ya laki mbili sio mbaya sana.



Tukiangalia hali halisi ya historia ya Tanzania, tunaweza kuona kuwa katika miaka 20 au 40 iliyopita imepata mafanikio makubwa katika kufanikisha utoaji wa chanjo.

Magonjwa kama kifaduro, Pepo Punda, Kifua Kikuu, Surua na hata ndui, yameweza kutokomezwa au kudhibitiwa kwa kiasi kikubwa, kutokana na serikali ya Tanzania kutekeleza vizuri kazi ya utoaji wa chanjo.

Mafanikio hayo yaliweka Tanzania kwenye safu ya juu miongoni mwa nchi zilizofanya vizuri kwenye kupambana na magonjwa hayo. Lakini kumekuwa na maswali ya kujiuliza, imekuwaje nchi yenye mfumo madhubuti wa kutoa chanjo, imeonekana kuyumba kwenye utoaji wa chanjo ya COVID-19?

Moja ya sababu kuwa zilizoiyumbisha Tanzania kwenye mapambano dhidi ya COVID-19, ni sauti za wataalamu wa afya kufunikwa na sauti za wanasiasa. Ni bahati mbaya sana kwa wanasiasa wametumia majukwaa ya siasa kuukanganya umma kuhusu COVID-19.

Kuna wale waliokuwa wanasema hakuna COVID-19, wengine walikuwa wanasema ni janja ya nchi za magharibi kutaka kudhibiti watu, na wengine wamekuwa wakisema wanasayansi wanatumiwa na watu wa nje kupotosha watanzania.



Lakini pia kumekuwa na hali mpya ambayo imeleta changamoto zaidi. Huko nyuma wakati wa utoaji wa chanjo ya Polio, Kifua kikuu, Pepopunda, Dondakoo, Kifaduro, serikali kupitia wataalam wa wizara ya afya ilifanya uhamasishaji mkubwa kupitia vyombo rasmi vya habari, yaani Radio Tanzania na magazeti ya chama na serikali.

Mbali na hilo kulikuwa na kampeni maalum za utoaji elimu shuleni na hata mitaani. Lakini sasa kuna watu wa dini, wanasiasa na wengine wasio na utaalam wowote wa afya au sayansi ya tiba, wanatumia mitandao ya kijamii na majukwaa mengine kukosoa, kupotosha na hata kubabaisha watu kuhusu chanjo ya COVID-19. Hali hii ya kusikitisha imekuwa ikienezwa bila hatua zozote zenye nguvu.

Hivi karibuni kumekuwa na video zikisambaa kupitia mitandao ya YouTube, WhatsApp na mingine mingi, zikionesha watoto wakikimbia shule kwa kutishiwa kuwa watoa chanjo wamekuja, video za uongo zinazoonyesha madhara ya chanjo n.k. na bahati mbaya ni kuwa hakuna hatua madhubuti zilizochukuliwa kukabiliana na hali hiyo.



Serikali ya Tanzania imefanya jambo la maana kujiunga na mpango wa COVAX kuhusu chanjo, na hata kutaja vipaumbele vyake katika kutoa chanjo.

Hii ni kutokana na kutambua wazi kuwa utoaji wa chanjo ni sehemu muhimu ya juhudi za kupambana na COVID-19, sambamba na hatua nyingine kama vile uvaaji wa barakoa, kutumia vitakasa mikono, kuzingatia umbali wa kijamii na kanuni nyingine za afya.

Tukiangalia hali kwenye nchi zilizofanya vizuri kazi ya utoaji wa chanjo, tunaweza kuona kuwa hali imeanza kurudi katika hali ya kawaida.

Ni hivi karibuni tumeona katika nchi za Ulaya viwanja vya soka vimeanza kujaa watazamaji waliopewa chanjo, fukwe zimeanza kuwa na watu, na hatua za zuio zinaendelea kupunguzwa. Yote haya ni kutokana na mafanikio ya utoaji wa chanjo.

Cha muhimu kwa sasa ni kuhakikisha kuwa wapotoshaji na watu wasio na mamlaka ya kuongea mambo yanayohusu afya au sayansi ya chanjo hawapati fursa, na wataalamu wenye mamlaka kuendelea kuelimisha na kuhamasisha watu.



Na Washirika CRI